自從上次跟家姐佢地去有機農場買過黎食就上在瘾, 我好少見到係街市有得賣, 就咁炒好落鹽就食得, 乜都唔落最正!  以質地黎講, 我覺得佢同覓菜波菜一樣, 都係高草酸果隻, 最好同一餐唔好食埋豆腐之類嘅食物, 以防食埋食埋會出事.

唔好睇炒埋得咁少, 只係因為我一上碟就食在一半先影, 凍左好似有些少苦味, 同無咁香.  同場加映蒸石斑, 唔知係咪我妹仔脷, 覺得青斑呀, 黃腳立呀, 鱸魚呀果d都好食過佢......

黃豆浸左一晚, 發大左成倍

打爛佢

加水煲滾

加冰糖同薑片......加左薑片無咁寒, 不過無咁好味我覺得

滾左之後小心滾瀉, 如果唔係.....除左個爐有排抹之外, 仲有心臟病發嘅危險, 因為.....

個煲有豆渣, 好易滾瀉, 於是我就搬左張櫈坐係個爐前面睇住佢滾.  係就黎滾嘅時候, 娘親好八咁走左入廚房睇我點整, 佢問得兩問我傾得兩傾, 係毫無先兆之下, 娘親係度大叫...... 果下我真係俾佢嚇到成個跳起...... 原來佢見到個煲滾瀉...... 真係俾佢嚇到命都短幾年

我: "俾你嚇鬼死我, 無端端咁大聲叫都無用架, 拎起個蓋未得囉!"

娘: "你坐係度阻住晒, 我隻手唔夠長嘛! 嚇親咁你食唔食救心丹呀?"

我: "你估我係你咩食救心丹, 有無保嬰丹呀咁?"

娘: "保嬰丹呀? 無播! 得救心丹咋, 你食唔食呀?"

我: "......... 我仲未駛食救心丹呀嘛? 你當我七老八十?"

娘: "咁你喳丫嘛"

我: "............ 無野啦! 總之我末整好之前你唔好再入黎就得啦!"

跟住, 娘親走左去午睡

就係瀉到咁嘅樣, d渣煲乾左攪到我抹左好耐......

煲到d糖溶晒, 試味, ok嘅話就可以隔渣

隔好渣之後再煲滾就飲得啦!

粘米芋係鄉下醫咳嘅秘方, 醫感冒未清嘅久咳勁有效, 但整法相當複雜同麻煩, 一定要煲足6粒鐘, 仲要唔可以食到d芋, 就算唔小心吞左少少(只有芝麻咁大粒碎), 都可以攪到好唔舒服, d芋仲要唔可以接觸到皮膚, 娘親整果陣只帶左一隻手套, 另一隻手唔小心掂到d芋, 佢話足足又癢又痛左兩三日........ 唔怪得家下鄉下d人興煲芋葉, 煲兩個鐘就ok, 又唔駛咁煩喎!

至於雞屎藤, 向來我都好鐘意佢陣味.  不過琴日幫娘親整完有d改觀...... 唔怪得愛子向來都唔鐘意雞屎藤...... 就係我用攪拌機打爛d葉果陣......陣味真係好難頂......99%同真嘅雞屎一樣咁嘅味......勁臭勁難聞呀! 真係唔怪得會叫雞屎藤.........原理應該同噴香水一樣, 太濃嘅話就算幾香都會覺得臭.

清熱解毒, 正!

都ok啦! 今次條魚無問題, 原來上次酶左係因為蒜頭放係條魚度太耐.  d蝦係意外地買嘅, 因為見到又平又生猛(當然加埋扼秤之後無咁抵), 本來諗住整蝦仁, 見咁新鮮忍唔住蒸左d黎食.

條魚未蒸之前係咁嘅, 超級老人痴呆嘅我, 買完之後就唔記得左係咩野魚黎, 只係隱約記得好似係三個字嘅......有無人可以話俾我知?

娘親已經落左通牒叫我清雪櫃, 又無得玩啦......

用冰糖, 玉桂枝, 加左少少rum酒, 味道都ok.  因為用玉桂枝, 所以玉桂味比玉桂粉淡, 雖然好似浪費左d玉桂枝咁, 但我覺得比起用玉桂粉整好味.

仲有, 我發現寒咳飲薑水會好d, 千奇唔好飲蘿蔔湯, 因為我琴日煲在猴頭菇花膠湯, 因為雪櫃有包唔知幾時買嘅甘筍, 就順手落埋落去煲......結果, 琴晚隻狗又吠天光......本來飲左兩日薑水夜晚經已無咳, 可以一覺瞓到天光, 唉! 睇黎剩番係度嘅甘筍, 都係要喂垃圾筒架啦!

味道無問題, 但係唔知點解, 除左魚脊, d肉入口係酶嘅? 好失望, 條魚明明好新鮮, 處理果陣d肉好實, 個枮板又無整過蘿蔔同木瓜, 唔通係蕃薯? 呢個真係一個謎黎! 有無人可以講個答案俾我知呢?

呢盒係早排梁師奶送嘅猴頭菇湯禮盒, 娘親敦左佢係櫃頂, 我就一直都無開黎睇過, 今日心血來潮打開黎睇, 勁開心~~

裡面有四包湯包, 有响螺, 花膠, 靈芝同姬松茸睇到我流晒口水

之前叫娘親煲佢話佢唔飲, 等我聽日煲黎試下都好, 唔知煲邊包好呢?